我哋以前成日聽到「信耶穌得永生」，但在現今世代，當聽到呢句說話嘅時候，好多人都會話你(或者自己都覺得)「離地」，甚至有人講:「叫你個耶穌落嚟見我。」但係，呢個亦都係我哋嘅信仰核心，呢樣嘢亦都不能否認。
然而，信耶穌得永生又係唔係我哋所諗，到將來死嘅時候先出現嘅嘢呢？其實係相反，反而係當你承認耶穌係你救主，同佢 "Connect" (相連）嘅時候，呢個「永生模式」就已經啟動。然後籍著聖經嘅默示、教訓、督責、使人歸正，讓我哋認識到在上帝嘅永恆國度裡嘅公平公正，尊嚴慈憐，先係佢所睇重。
早前當我預備講章嘅時候，我寫咗一大部分內容都係鼓勵弟兄姊妹要去愛你嘅鄰舍，服侍「最小」嘅一群人，因為呢個係耶穌嘅教導，但我同時忘記咗，耶穌講出呢啲比喻時係想提到終末出現嘅時候，我地要警醒同埋忠心，預備"End game"時嘅審判。
任何事情都會有終結嘅一日，地上任何事都唔會永遠長存，權勢嘅氣焰會有熄滅嘅一日，我哋所得到嘅成就同財富亦會有終結嘅一日；上帝嘅國先係永恒嘅國，呢個係我哋信耶穌嘅群體需要去肯定。得永生嘅重點，唔係我哋立時變到有不死身，刀槍不入；反而在於我哋因為與永恆嘅上主相連，理解世上事物嘅眼光唔同咗，而我哋地上所做嘅一切，都結結實實嘅喺天國同聖山上累積，喺上主嘅磐石上直指向永生1。
1 梁栢堅著： 《時勢好惡，做基督徒好難》，頁 64-66。